നമുക്കിടയില്‍

പകല്‍

ഞാന്‍ മേഘങ്ങളുടെ

പാവക്കൂത്ത് കാണുകയായിരുന്നു .

നീ ,

പക്ഷിചിറകുകളിലെ വര്‍ണങ്ങളും .

രാത്രി ,

നിനക്കു

കണ്ണ് നിറയെ

നക്ഷത്രങ്ങള്‍ ആയിരുന്നു ;

എനിക്ക് ,

അവയ്കിടയിലെ ഇരുട്ടും..

എന്നിട്ടും നീ പറഞ്ഞു

നമുക്കിടയില്‍

ഒരു നെടുവീര്‍പ്പിന്റെ

അകലം പോലും ഇല്ലെന്നു !

എന്നത്തേയും പോലെ ,

ഞാന്‍

കേട്ടിരുന്നു..

ഒടുവില്‍,

നമുക്കിടയില്‍ എന്തെന്ന്

ഞാനറിയുന്നു ..

ഒരു നൂല്‍പ്പാലം ...

കടക്കുക -

നീയോ , ഞാനോ ?

മരം മഴ നനയുമ്പോ‍ള്‍...

മരം മഴ നനയുമ്പോ‍ള്‍ ,

ഒരു മഴക്കൂട്ടമാകെ

കൈ കോ‍ര്‍ത്തു പിടിച്ച് ,

തമ്മില്‍ അടക്കം പറഞ്ഞും

ഉറക്കെച്ചിരിച്ചും

മരത്തിലൂടെ കടന്നു പൊവുകയാണു.

ആദ്യത്തെ തുള്ളി

ഇലയിലൊന്നു തൊടുമ്പോളേക്കും

അങ്ങു താഴെ വേരുകള്‍ പറയും,

വരുന്നുണ്ട് ,വരുന്നുണ്ടെന്നു !!

പിന്നെ,

ഇലകളും ഉടലുമെല്ലാം

മഴയാകും.

പെയ്തു തോര്‍ന്നാലും

മണ്ണ് പറയും

ഇനിയും, ഇനിയുമെന്നു..

അപ്പോള്‍,

ഇലകള്‍

ഓരോ തുള്ളിയായി

താഴേക്കൊഴുകും..

ഗ്രീറ്റിങ്സ്

വിഷം കുടിപ്പിക്കപ്പെട്ട ഈ നക്ഷത്രം

ഇനിയും ,

ഏതു പിറവിയിലേക്കാണു

വിരല്‍ നീട്ടുന്നത് !

ഓരോ നക്ഷത്രവിളക്കിനുമറവിലും ,

ഒരു കുരിശു തയ്യാ‍റാക്കപ്പെടുകയാണു..

നമ്മുടെ മൌനങ്ങള്‍കൈ കഴുകിയൊഴിയുന്നതു

ഏതു ബലിമൃഗത്തിന്‍രക്തത്തില്‍ നിന്നാണ് ?

ഇന്നും ഗത്സമെനുകളില്‍മുഴങ്ങുന്നുണ്ട്

കേള്‍‍ക്കപ്പെടാതെ പോയയാചനകള്‍..

അപ്പോള്‍,പറഞ്ഞു വന്നതു ഇതാണു..

ക്രിസ്തുമസ് ആശംസകള്‍...